Այս երկուսին դժվար է առանձին ոչ միայն պատկերացնել, այլև հանդիպել։ Նրանք միայն դպրոցում են տարբեր դասարաններում սովորում, հետո օրվա մնացած մասը միասին են։ Միասին դաս են անում, ինքնագնաց (սամակատ) կամ անվաչմուշկ քշում ու շան նորածին ձագերի հետ խաղում։ Նրանք երկուսն էլ «զինաթափող» ժպիտ ունեն, ու նկարելու համար նրանց հատուկ առիթ պետք չէ։

Իրինան և Էրիկը քույր ու եղբայր են Արմավիրի մարզի Գետաշեն համայնքից։ Նրանք ՔՈԱՖ-ի նկարչության ծրագրի առաջին մասնակիցներից են։ 

«Չեմ էլ հիշում՝ ոնց իմացանք ու գրանցվեցինք ծրագրին, բայց ինձ շատ է դուր գալիս նկարել»,- խոստովանում է 9-ամյա աղջիկը։

Նկարչությամբ, սակայն, չեն սահմանափակվում Մխիթարյանների հետաքրքրությունները։ 10-ամյա Էրիկը, օրինակ, շատ է ուզում դաշնամուր նվագել սովորել, իսկ Իրինան՝ պարով զբաղվել։