Իզա Էվոյան` Արջուտի միակ հեծանվորդ աղջիկը
Մարտի 19, 2021
Ինքնուս սովորել երաժշտական գործիքներ նվագել, գրազով ձողի վրա ձգվել, շյուղերով գործել, ինքնաշեն պարանների վրա «շպագատ» նստել, թատրոնում խաղալ. այս շարքը կարելի է անվերջ շարունակել։
Արջուտից 17-ամյա Իզա Էվոյանի հետաքրքրությունները չափ ու սահման չունեն։
«Մեր տանը բոլորը մեկ կամ մի քանի երաժշտական գործիք են նվագում ու երգում, բայց ես միշտ ուզել եմ դերասանուհի դառնալ, թատրոնում խաղալ»,-ասում է Իզան։
Նա մի քանի տարի անգամ թատերական խմբակ է հաճախել Վանաձորում, բայց ավարտական դասարանում դերասանուհի դառնալու երազանքը տեղը զիջեց լրագրությանը։
«Թատրոն ես դեռ կվարադառնամ, ուղղակի մի քիչ ուշ։ Հիմա ուզում եմ լեզուներ սովորել, շատ եմ ուզում թուրքերեն ուսումնասիրել»,-ասում է Իզան։
Իզան սիրում է եղբոր՝ Սերոժայի հետ ձողի վրա ձգվել։ Իսկ պարանները նրա գաղափարն է, «շպագատն» ավելի սիրուն է լինում։
Պատմության դասն է։ Ավարտական քննությանը հաշված ամիսներ են մնացել։
Իզան շատ է աշխատում, որպեսզի լավ գնահատականներով ավարտի դպրոցը։
Իզան չհամբերեց, մինչև որ ՍՄԱՐԹ-ում կհաճախի երաժշտական գործիքների ծրագրին, ու սկսեց ինքնուրույն կիթառ նվագել սովորել։
Շախ և մատ։ Շախմատը Իզայի ամենաուժող կողմը չէ։ Նոր է սովորում խաղալ։
Գործել Իզան սովորել է տատիկից։ Ասում է՝ հիմա դասերի հետ չի հասցնում շատ ժամանակ տրամադրել գործելուն։
Իզայի ընտանիքում բոլորը մի քանի գործիք են նվագում։ Նա էլ, բացի կիթառից, մի քիչ շվի է նվագում և շատ է ուզում հարվածային գործիք նվագել սովորել։
Իզան հորեղբոր հետ խոսում է հարվածային գործիքներից: Վերջինս ժամանակին դհոլ էր նվագում:
Արջուտում Իզան եզակի աղջիկներից է, որ տղաներին հավասար հեծանիվ է քշում գյուղի քարուքանդ ճանապարհներին։
