Պողոսյան քույրերի տանդեմը

Դեկտեմբերի 8, 2021

Հեղինակ՝ Քնար Բաբայան
Լուսանկարները՝ Քնար Բաբայանի

3 րոպե կարդալու համար

Մեծը զբաղվում է շյուղագործությամբ ու երազում ծրագրավորող-քիմիկոս դառնալ, իսկ կրտսերը հելունագործությամբ է զբաղվում ու երազում նկարչուհի-դերձակ դառնալու մասին: Պողոսյան քույրերին միավորում է թենիսը, հարավկորեական ժամանակակից երաժշտության նկատմամբ սերն ու ճարտարագիտությունը:

Երբ երկու տարի առաջ ՔՈԱՖ-ի ճարտարագիտության ու բասկետբոլի ծրագրերը մեկնարկեցին Արմավիրի մարզի Շենիկ համայնքում, 12-ամյա Անահիտ Պողոսյանը շտապեց գրանցվել բասկետբոլի ծրագրին:

«Բասկետբոլի խումբը շատ արագ հավաքվեց, ու ես չհասցրի գրանցվել: Այդպես ես հայտնվեցի ճարտարագիտության ծրագրում»,- պատմում է Անահիտը, ով այնքան սիրեց ճարտարագիտությունը, որ կարճ ժամանակ հետո փոքր քրոջը` 9-ամյա Նունեին ևս «բերեց» ճարտարագիտության:

Անահիտն առաձնահատուկ հպարտությամբ է ասում, որ չնայած Նունեն փոքր է տարիքով, բայց ճարտարագիտությունից լավ գլուխ է հանում:

 

Պողոսյան քույրերի շարքերը համալրվել են նոր անդամով: Անահիտը հիմա ազատ ժամանակի մեծ մասը նորածին քրոջ հետ է անցկացնում:

 

Նունեն սիրում է հելունով թևնոցներ գործել ու նվիրել ընկերներին:

 

Պողոսյան քույրերի նոր տանդեմը:

 

Չնայած տարիքային տարբերության՝ քույրերը միմյանց օգնում են դասապատրաստման գործում:

 

Պլեճի սեզոնը Շենիկում պաշտոնապես բացված է:

 

Նունեն վառարանի վրա պատրաստվող ուտեստների մեծ վարպետ է: Տնեցիք ամենից շատ սիրում են նրա պատրաստած լավաշով ու պանրով տաք «բուռումները»:

 

ՔՈԱՖ-ի ճարտարագիտության ծրագրի մաս է կազմում նաև Լեգո ռոբոտաշինությունը:

 

Շենիկում ճարտարագիտության ծրագրում ընդգրկված է 16 երեխա: Նունեն տարիքով ամենափոքրերից է: