Նա վստահ է, որ սովորելու ամենաարդյունավետ ձևն անդադար ինքնակրթությունն է։
Ծանոթացեք 17-ամյա Աննա Բեգլարյանի հետ։ ՔՈԱՖ ՍՄԱՐԹ կենտրոնի մարքեթինգի ուսանողը Դսեղից է՝ Ամենայն հայոց բանաստեղծ Հովհաննես Թումանյանի համագյուղացին։ Իր հռչակավոր ծննդավայրի իսկական սիրահար է Աննան։ Գյուղում տաղանդաշատ երիտասարդների պակաս չկա․ նրանք թումանյանական ներշնչանքով և հպարտորեն տանում են գյուղը դեպի նոր նվաճումներ։
Լինելով 6 քույր-եղբայրներից հինգերորդը՝ Աննան հասցնում է սովորել, աշխատել և նույնիսկ օգնել տնային գործերում։ Ժամանակն իր համար ամենաարժեքավոր ռեսուրսն է, ինքն էլ փորձում է խելամտորեն օգտագործել ամեն վայրկյանը։
Նա դիմավորում և ուղեկցում է տեղացի և արտասահմանցի զբոսաշրջիկների, քանի որ որպես զբոսավար է աշխատում Դսեղի Բնության և այցելուների կենտրոնում։ «Տուրիստներից շատ բան եմ սովորում։ Մի անգամ ամերիկահայ մի զբոսաշրջիկ, հիացած Դսեղի բնությամբ, ասաց, որ պետք է իրապես գնահատեմ նման դրախտավայրում ապրելու առավելությունը»,- հիշում է երիտասարդ դսեղցին, որ անսահման սիրում է իր համայնքը։
Ազատ ժամանակ տվեք իրեն, ու նա էլի ինքնակրության վրա կծախսի այն։ Լեզուներն իր տարերքն են, հատկապես գերմաներենը։ Ոչ մի օր չի անցկացնում առանց գրքերը փորփրելու, օնլայն դասերի մասնակցելու կամ YouTube-ում տեսանյութեր դիտելու, որ լեզվին լիարժեք տիրապետի։ «Քնի սիրահար չեմ։ Նախընտրում եմ ավելի օգտակար բանի վրա ծախսել ժամանակս»,- խոստովանում է Աննան։
«Առանց նպատակների կյանքն անիմաստ է»,- վստահ է նա։ Արվածն ամփոփելն ու հաջորդ քայլերի մասին մտածելն Աննայի համար սովորություն է դարձել։ ՔՈԱՖ ՍՄԱՐԹ կենտրոնն այն նոր աշխարհն է, որ առաջարկում է ավելի լավ իրականություն և լավագույն ապագա։ «ՍՄԱՐԹ քաղաքացի դառնալը միայն հենց այնպես ասվող արտահայտություն չէ․ ինչ էլ որ սովորում ենք ՍՄԱՐԹ-ում, մեզ կատարելագործում է և՛ որպես անհատ, և՛ որպես քաղաքացի»։
Աննան հավատացած է, որ ջանադիր աշխատանքը միշտ արդյունք է տալիս։ Ու թեև կյանքում շատ դժվարությունների է հանդիպում, իր ձեռներեցական ջիղը կամուրջ է դառնում երազանքների իրագործման համար։ «Մեր գյուղերի երիտասարդները շատ ակտիվ ու եռանդուն են։ Տխուր է միայն, որ նրանցից շատերը մանկությունն ու պատանեկությունն անցկացնում են այստեղ, իսկ հետո տեղափոխվում և աշխատում են Երևանում կամ արտերկրում։ Ես բազմաթիվ բիզնես գաղափարներ ունեմ՝ կապված գյուղիս հետ, ու երբ մեծանամ, դրանք կյանքի եմ կոչելու»։
