Խաղաղության և երեխաների ու ընտանիքների պաշտպանության կոչ

2023 թվականի սեպտեմբերի 19-ին Ադրբեջանը լայնածավալ ռազմական հարձակում սկսեց Արցախի (Լեռնային Ղարաբաղի) հայ բնակչության դեմ՝ թիրախավորելով կարևոր նշանակության ենթակառուցվածքներ և սպանելով երեխաների, կանանց ու ծերերի։ Այս հարձակումը Լաչինի միջանցքի՝ արտաքին աշխարհին կապող Արցախի միակ ճանապարհի, տասնամսյա շրջափակման արդյունքում ստեղծված ծանր իրավիճակի գագաթնակետն էր։ Առաջին անհրաժեշտության ապրանքների (սննդամթերք, դեղորայք, վառելիք և այլ կենսական նշանակության իրեր) սահմանափակ հասանելիության այս երկար ժամանակահատվածն Արցախի խոցելի բնակչությանը հասցրեց հումանիտար աղետի: Վերջին ռազմական հարձակումների արդյունքում Արցախում արդեն իսկ զոհվել է ավելի քան 200, վիրավորվել 400 մարդ, ավելի քան 10,000 մարդ տեղահանվել է, այդ թվում՝ երեխաներ, կանայք և ծերեր:

Մարդիկ մնացել են առանց կացարանի, սննդի և ապրուստի այլ միջոցների։ Հազարավոր ընտանիքներ մասնատվել են։ Առողջապահական համակարգը գտնվում է ծանր վիճակում. հիվանդանոցները զրկված են էլեկտրականությունից և ունեն դեղերի սուր պակաս:

«Հայաստանի մանուկներ» հիմնադրամը (ՔՈԱՖ) լրջորեն մտահոգված է Արցախում ստեղծված իրավիճակով և անմեղ հայ երեխաների, կանանց ու ընտանիքների վրա դրա ունեցած հետևանքներով: Որպես երեխաների բարեկեցության և զարգացման ուղղությամբ աշխատող կազմակերպություն՝ մենք չափազանց մտահոգված ենք տեսնելով այն տառապանքները, որոնք հակամարտության ծայրահեղ սրման պատճառով կրում են երեխաներն ու նրանց ընտանիքները:

Ներկա իրավիճակում երեխաներն առավել խոցելի են։ Նրանք մեր ապագայի հիմքն են, և նրանց ու իրենց ընտանիքների պաշտպանությունը պատերազմի ու բռնության աղետներից յուրաքանչյուր անհատի, համայնքի և ազգի բարոյական պարտքն է:

ՔՈԱՖ-ը կոչ է անում բոլոր կողմերին պարտադրել Ադրբեջանին անհապաղ վերականգնել Լաչինի միջանցքով մարդկանց և տրանսպորտային միջոցների ազատ տեղաշարժն ու անվտանգությունը՝ Արդարադատության միջազգային դատարանի որոշումների համապատասխան:

Մենք խնդրում ենք միջազգային հանրությանը մոբիլիզացնել հրատապ մարդասիրական օգնություն՝ տուժած երեխաներին և ընտանիքներին աջակցելու նպատակով: Կենսական ապրանքներն ու ծառայությունները՝ ներառյալ առողջապահությունը, սնունդը, կացարանը և հոգեբանական ու սոցիալական աջակցությունը պետք է հասանելի լինեն նրանց դժվարություններն անհապաղ մեղմելու համար:

ՔՈԱՖ-ն իր զորակցությունն է հայտնում բոլոր նրանց, ովքեր կորցրել են իրենց սիրելիներին և այժմ պայքարում են այս հումանիտար ճգնաժամի ծանր հետևանքների դեմ: ՔՈԱՖ-ը կհամակարգի իր գործողությունները ՀՀ կառավարության, հայկական սփյուռքի և տեղական ու միջազգային կազմակերպությունների հետ ներդնելու ռեսուրսներն այս հումանիտար ճգնաժամը հաղթահարելու նպատակով։

Լուսանկարները՝ Մարութ Վանյանի

Վերջին հրապարակումները

Բացահայտելով ու զարգացնելով լոռեցի երեխաների ստեղծագործական տաղանդը

Ձգտելով ավելի համախմբված հասարակության ձևավորմանը

ՀԱՅՈՑ ՑԵՂԱՍՊԱՆՈՒԹՅԱՆ ՕՐ. ԳԱՐՈ ԱՐՄԵՆԻ ՈՒՂԵՐՁԸ

Կատեգորիա

ԿԱՊ ՄԵԶ ՀԵՏ

Նյու Յորք, ԱՄՆ
149 5-րդ պողոտա, Suite 500
Նյու Յորք, NY 10010
+1 (212) 994-8234

Երևան, Հայաստան
Մելիք Ադամյան 2/2
Երևան 0010, ՀՀ
+374 10 502076
[email protected]