Օգոստոսի 28-ին ՀՀ Վարչապետ Նիկոլ Փաշինյանն այցելել է «Հայաստանի մանուկներ» հիմնադրամի (ՔՈԱՖ) կողմից կառուցված Դսեղի առողջության կենտրոն, որը նվիրաբերվելու է պետությանը։
Շրջայցի ընթացքում հիմնադրամի գործադիր տնօրեն Լիանա Ղալթաղչյանը ներկայացրել է նորակառույց կենտրոնի նորարարական լուծումներն ու հնարավորությունները՝ նշելով. «Մեր նպատակն է ապահովել առողջապահական ծառայությունների հասանելիություն Հայաստանի ավելի լայն գյուղական համայնքների համար՝ սերտորեն համագործակցելով պետական և մասնավոր շահագրգիռ կողմերի հետ»:
Շինարարության բարձրագույն ստանդարտներին համապատասխան այս կենտրոնը շահագործման կհանձնվի առաջիկա երկու ամիսների ընթացքում և կսպասարկի Թումանյանի տարածաշրջանի 7 բնակավայրերի բնակչությանը՝ դառնալով կարևոր հարթակ ՀՀ Առողջապահության նախարարության առողջության առաջնային պահպանման բարեփոխումների շրջանակում։
