Դիանա Մուրադյան. ՍՄԱՐԹուկի հատուկ վիզայով «ուղիղ չվերթով» դեպի ՍՄԱՐԹ ծրագրեր

Լոռու Թումանյան քաղաքից 9-ամյա Դիանա Մուրադյանն այն երջանիկներից էր, ում ՔՈԱՖ-ի Յուրեջյանի անվան ՍՄԱՐԹ կենտրոն գալու համար ոչ թե բաց հայտը լրացնելու արագություն էր պետք, այլ ուղղակի երկու տարով մեծանալ։

Դիանան 4-6 տարեկանում հաճախել է ՔՈԱՖ-ի Դեբեդի Երեխայի ու ընտանիքի կենտրոն, որն ավարտելուց հետո ստացել է հատուկ վիզա, ինչն էլ սմարթուկներին հնարավորություն է տալիս 8 տարեկանը լրանալուն պես սկսելու ՍՄԱՐԹ ուղին։

«Տեսնելով ՍՄԱՐԹ-ի մեծ շենքը՝ առաջինը մտածեցի, որ շատ ծրագրեր ու խաղեր կլինեն։ Սկսեցի ֆինանսներ ծրագրից, հետո ավարտեցի երաժշտական գործիքների ու ֆուտբոլի ծրագրերը»,- հիշում է Դիանան։ 

Երբ նա իմացավ, որ ֆուտբոլի ծրագրում է ներառված, զարմացավ, բայց որոշեց հետ քայլ չանել ու փորձել։

«Մինչ այդ երբեք ֆուտբոլ չեմ խաղացել։ Փորձեցի ու ստացվեց։ Արդեն հավեսով եմ մասնակցում պարապմունքներին ու սիրով բոլորի հետ ֆուտբոլ եմ խաղում»,- ոգևորված պատմում է նա ու հավելում, որ ամենաշատը գնդակով նախավարժանքներն է սիրում, որոնք օգնում են ավելի արագ ու ճկուն լինելուն։ 

Դիանան անթաքույց հպարտությամբ է պատմում, որ պաշտպանի դիրքում հանդես գալով, շատ քիչ գոլ է բաց թողել։

«Ֆուտբոլի պարապմունքի վերջում երկու թիմի ենք բաժանվում ու ֆուտբոլ խաղում։ Ճիշտ է, աղջիկները քիչ են, բայց ես սիրում եմ, երբ խառը թիմով ենք խաղում»,- ասում է Դիանան ու հավելում, որ ՍՄԱՐԹ-ն ամենաշատը սիրում է ծրագրերի բազմազանության, նոր ընկերներ ձեռք բերելու ու վերջինններիս հետ սովորելու ու զվարճանալու համար։

Նա համոզված է, որ ՍՄԱՐԹ-ի ծրագրերն օգնում են իր նման երեխաներին կամ մասնագիտություն ընտրել, կամ արդեն ընտրած մասնագիտության մեջ վարժվել։

«Եթե չգիտես՝ ինչ ես ուզում դառնալ, ապա կարող ես հերթով փորձել բոլոր ծրագրերն ու պարզել՝ որն է ավելի շատ քեզ դուր գալիս ու լավ ստացվում քեզ մոտ»,- բացատրում է իննամյա ՍՄԱՐԹացին, ով անհամբեր սպասում է նկարչության ծրագրին։ 

Դիանայի ամենամեծ երազանքը կատու, անսահման կտավներ ու ներկեր ունենալն է։

‍