«Պատմություններ, որոնք փոխում են աշխարհն ու ապագան»

Թոմաս Էդիսոնի գյուտից մինչև արհեստական բանականություն, Ֆրիդա Կալոյի ու Կոկո Շանելի արվեստից մինչև Մայքլ Ջեքսոնի երգեր։ 560 դիմորդ, 7 մրցութային ուղղություն (պար, վոկալ, թվային նկարչություն, ձայնային ձևավորում, նկարչություն, թատերարվեստ, երաժշտություն), 89 հաղթող։

Օրերս ՍՄԱՐԹ կենտրոնում կայացավ «Պատմություններ, որոնք փոխում են աշխարհն ու ապագան» խորագրով «Վահէ և Լյուսի» հիմնադրամի ու ՔՈԱՖ-ի համատեղ կազմակերպած թվով երրորդ մրցանակաբաշխության արարողությունը։ 11-18 տարեկան ՍՄԱՐԹացիներն ու լոռեցի պատանիները անհատական և հիբրիդային ձևաչափով հանդես եկան աշխարհն ու ապագան փոխող իրենց պատմություններով։

Մրցույթին նախորդել են ՍՄԱՐԹ կրթակարգի վեց ուղղությունները ներառող աշխատարաններ, որոնք վարել են տեղացի և տարբեր երկրներից հրավիրված մասնագետներ։ Աշխատարանների միջակայքում կազմակերպվել են նաև ՍՄԱՐԹ այցերը։

Այս տարի մի քանի նորամուծություններ են եղել.

Նախ՝ իրազեկման շրջայցեր են իրականացվել ՔՈԱՖ-ի ոչ շահառու համայնքներ (Տաշիրի ու Սպիտակի գյուղեր)։

Բազմաթիվ դիմորդների խնդրանքով վերականգնվել է վոկալի անվանակարգը։

Այս տարի չեն մոռացել նաև տաղանդավոր ՍՄԱՐԹ շրջանավարտներին ու հատուկ անվանակարգ են սահմանել նրանց համար։

Երրորդ տարին է, ինչ ՔՈԱՖ-ը հաջողությամբ համագործակցում է «Վահէ և Լյուսի» հիմանդրամի հետ, որի նպատակն է հանրայնացնել մշակույթը։

«Մրցույթը լավ մեկնարկային հարթակ է արվեստով հետաքրքրված լոռեցի բոլոր պատանիների համար։ Այս կերպ փորձում ենք ՍՄԱՐԹ-ի ռեսուրսը հասանելի դարձնել Լոռու շուրջ 60 համայնքների 11-18 տարեկանների համար»,- ասում է ՍՄԱՐԹ-ի կենտրոնի ղեկավար Մետաքսյա Դավթյանն ու հավելում, որ դրամական պարգևներն էլ վկայում են այն մասին, որ կարելի է արվեստով գումար վաստակել, ինչը պակաս կարևոր չէ։