Լոռու մարզից մինչև Սյունիք. անգլերեն սովորող 700 աշակերտ սկսում է իր հաջողության ուղին

Հայաստանի հինգ մարզում մեկնարկել է ՔՈԱՖ-ի Անգլերենի ծրագրերի 2026 թվականի ուսումնական փուլը։

Երբ լսում ենք ՔՈԱՖցիների հաջողության պատմությունները՝ լինի դա կրթության, կարիերայի, թե սեփական բիզնեսի ոլորտում, այդ ճանապարհը հաճախ սկիզբ է առնում հենց հիմնադրամի Անգլերենի ծրագրերից։

Արդեն երկու տասնամյակ է՝ ՔՈԱՖ-ն իրականացնում է Հայաստանի ամենաազդեցիկ արտադպրոցական ծրագրերից մեկը, որն առանձնանում է ոչ միայն ուսումնական բարձր որակով, այլև իր ձևավորած ուրույն մշակույթով։ Երեխայակենտրոն դասապրոցեսը խթանում է համագործակցությունը, հետաքրքրասիրությունն ու ակտիվ ներգրավվածությունը։

Ուսումնական նյութերը մշակված են այնպես, որ արտացոլեն Հայաստանի համայնքների իրականությունը՝ միաժամանակ զարգացնելով գլոբալ մտածողություն։ Այս մոտեցումն անգլերենի արտադպրոցական ծրագիրը վերածում է ոչ միայն գիտելիքի ձեռքբերման, այլև կապեր հաստատելու և քաղաքացիական արժեքներ ձևավորելու հզոր հարթակի։

2026 թ.-ին ևս ՔՈԱՖ-ի առաքելությունը նույնն է, միայն թե ընդլայնվել են ծավալներն ու կատարելագործվել է մեթոդաբանությունը։ Ահա թե ինչպիսին է մեր ամենասիրված ծրագրերից մեկի նորագույն սերունդը՝ փաստերով ու թվերով։

Անգլերենի Աքսես ծրագրի ավելի քան 300 ուսանող՝ հինգ մարզում. Սյունիքը միանում է ծրագրին

Հայաստանում ԱՄՆ դեսպանատան հետ ՔՈԱՖ-ի շարունակական համագործակցության շնորհիվ Անգլերենի Աքսես ծրագիրն ընդլայնում է աշխարհագրությունը՝ միաժամանակ ամրապնդելով իր դերակատարումը այն մարզերում, որտեղ արդեն տարիներ շարունակ հաջողությամբ գործում է։

Այս տարին նշանավորվում է կարևոր ձեռքբերմամբ. ծրագիրն առաջին անգամ մուտք է գործում Սյունիք՝ զարգացման նոր հորիզոններ բացելով Գորիսի, Կապանի և Մեղրիի ավելի քան 200 աշակերտի համար։ Լինելով ՔՈԱՖ-ի առաջին սաները Հայաստանի հարավում՝ նրանք խորհրդանշում են մեր գործունեության նոր ու խոստումնալից էջը։ 

Միևնույն ժամանակ, Արմավիրի, Արագածոտնի, Շիրակի և Լոռու մարզերի շուրջ 100 աշակերտ միացել է իրենց համայնքներում գործող Անգլերենի Աքսես ծրագրին՝ շարունակելով ամրապնդել արտադպրոցական կրթության այն հզոր ցանցը, որը ՔՈԱՖ-ը հետևողականորեն կառուցում է տարիներ շարունակ։

Ավելի քան 200 ՍՄԱՐԹացի սկսել է անգլերենի խորացված ուսուցում

Անգլերենը ՔՈԱՖ ՍՄԱՐԹ կենտրոնի 19 անվճար ուղղությունների շարքում ամենամեծ հետաքրքրություն վայելող ծրագրերից է։ Այս տարի այն ընդլայնվել է և կգործի ամբողջ ուսումնական տարվա ընթացքում. 30 շաբաթվա համար նախատեսված է ընդհանուր առմամբ 60 դասաժամ։

ՔՈԱՖ-ի՝ 200-ից ավելի կրթաթոշակառու կատարելագործում է իր լեզվական հմտությունները

ՔՈԱՖ-ն իր շահառուներին ուղեկցում է առաջին քայլերից մինչև մասնագիտական կայացում։ Հիմնադրամի Կրթաթոշակների և կարիերայի զարգացման ծրագիրը, որ ֆինանսավորվում է Յուրեջյան ընտանեկան հիմնադրամի կողմից, երաշխավորում է բարձրագույն կրթության հասանելիությունը Հայաստանի համայնքներում բնակվող երիտասարդների համար։

Այս նախաձեռնությունը շատ ավելին է, քան պարզապես ֆինանսական օժանդակությունը: Այն զարգացնում է երիտասարդների ինքնակազմակերպման հմտությունները, քաջալերում է նրանց ակտիվ դերակատարումը համայնքում և կերտում ապագայի առաջնորդների: Անգլերենի ուսուցումն այժմ այդ կարևոր ճանապարհի անբաժանելի մասն է։

Նոր սերունդ, նոր ձեռքբերումներ

Ողջունելով մեր նոր ուսանողներին՝ վստահ ենք, որ նրանց հաջողություններն են ձևավորելու մեր վաղվա օրը: Մեծ հետաքրքրությամբ սպասում ենք նրանց առաջընթացին ու հաջողություններին։

‍