Արփինե Ղազումյան. ՍՄԱՐԹ-ից դեպի օպերային մեծ բեմեր
AՆա ընդամենը երեք տարեկան էր, երբ խաղալիք միկրոֆոնով երգում էր, վեցից գյուղում երգեցողության էր հաճախում, իսկ երբ Լոռիում ՍՄԱՐԹ կենտրոնը բացվեց, նա ծնողներին ստիպեց շտապ գրանցել իրեն։ Գլխավոր առիթը, ինչպես արդեն կռահեցիք, վոկալի ծրագիրն էր։
«Ամենասկզբում հնարավորություն կար երկու ծրագիր զուգահեռ անցնելու, ու ես ընտրեցի վոկալն ու անգլերենը»,- հիշում է Դսեղից սմարթացի Արփինեն, ում ՍՄԱՐԹապատումները ոգևորեցին փոքր քրոջն ու եղբորը, ովքեր, հետևելով ավագ քրոջ օրինակին, ՍՄԱՐԹուկից սահուն ՍՄԱՐԹացի դարձան։
Արփինեն խոստովանում է, որ, ճիշտ է, ՍՄԱՐԹ ուղու յուրաքանչյուր ծրագիրց մի նոր բան է սովորում, բայց վոկալի ծրագիրն իր համար եղավ շրջադարձային։
«Ես պետք է ծրագրավորող դառնայի, դասընթացների եմ հաճախել անգամ։ Բայց ՍՄԱՐԹ-ի վոկալի ծրագիրը ստիպեց ինձ մտափոխվել ու գնալ իմ երազանքի հետևից»,- գոհ ու համեստ ժպիտով ասում է Արփինեն։
Այսօր Արփինեն Վանաձորի Միքայել Թավրիզյանի անվան պետական քոլեջի երգեցողության բաժնի երրորդ կուրսի ուսանող է և զուգահեռ կիթառի դասերի է հաճախում։ Վերջնակետը օպերային մեծ բեմերին երգելն է։
Վերջերս նա ներգրավվել է նաև ՍՄԱՐԹ-ի թատերախմբի կատարմամբ «Ունոն ու Բենոն» ներկայացման մեջ։ Սա լավ առիթ էր թատերարվեստի ծրագրից հետո ուժերը փորձելու նաև «իսկական» ներկայացման մեջ։
«Այս ներկայացման շնորհիվ ես հաղթահարեցի բեմի վրա կաշկանդվելն ու ամաչելը»,- պատմում է Արփինեն։
Այս ՍՄԱՐԹ տարվա լավագույն ամփոփումն Արփինեի համար եղավ «Վահէ և Լյուսի» արվեստի ամենամյա մրցույթում միանգամից երկու անվանակարգում (վոկալ ու թատերարվեստ) հաղթանակը։
